Hlé á kjaraviðræðum í sumar og eingreiðslur

Gert hefur verið hlé á kjaraviðræðum aðildarfélaga BHM, þ.m.t. FHSS, við samninganefnd ríkisins (SNR) fram í ágúst.

Kjarasamningar við ríkið losnuðu 1. apríl sl. Í lok júní lagði SNR til að gert yrði hlé á kjaraviðræðum í júlí og að viðræðuáætlanir væru endurskoðaðar með tilliti til þess. Formenn BHM félaganna hafa nú undirritað endurskoðaðar viðræðuáætlanir við SNR. Samkvæmt þeim er stefnt að því að kjarasamningar náist eigi síðar en 15. september 2019.

Vegna þeirra tafa sem orðið hafa á viðræðum við SNR mun ríkið greiða starfsfólki sínu eingreiðslu að upphæð kr. 105.000 1. ágúst nk. Upphæðin greiðist hlutfallslega miðað við starfstíma og starfshlutfall á tímabilinu frá og með 1. apríl 2019 til og með 30. júní 2019. Þeir sem ekki uppfylla þetta skilyrði, ásamt því starfsfólki sem var í fæðingarorlofi á þessu tímabili, munu ekki eiga rétt á eingreiðslunni.

Greiðslan er hluti af kostnaðarmati væntanlegs kjarasamnings en með henni eru þó ekki lagðar línur um launahækkanir í væntanlegum kjarasamningum aðildarfélaganna.

Scroll to top